Kerhólsskóli

Öskudagur

hilmar — Mon, 20 Feb 2012 18:12:18 +0000

Miðvikudaginn 22.febrúar er Öskudagur. Börnin í leikskóladeildinni ætla að mæta í náttfötum og slá köttinn úr tunnunni.

Nemendur grunnskóladeildar mega koma í furðufötum í skólann þennan dag. Eftir hádegismat eða kl. 12:20 verður skemmtun í Íþróttahúsinu Borg í umsjá Foreldrafélags Kerhólsskóla. Kötturinn verður sleginn úr tunnunni og gefin verða verðlaun fyrir besta búninginn. Skemmtuninni lýkur kl 13:00 og þá aka skólabílarnir heim .

Fundur um einelti

hilmar — Mon, 20 Feb 2012 18:02:32 +0000

Fimmtudaginn 23. febrúar mun Kolbrún Baldursdóttir, sálfræðingur, flytja fyrirlestur í Grunnskóla Bláskógabyggðar um einelti.

Fyrirlesturinn hefst kl. 17:00 og tekur um klukkustund. Heitt verður á könnunni, og velkomið að koma með eitthvað gott með kaffinu og eiga spjall saman á eftir.

Erindið er öllum opið og hvetjum við foreldra, kennara og alla þá sem umhugað er um góða líðan barna að koma og hlýða á. Heimasíða Kolbrúnar veitir einnig góðar upplýsingar

http://www.kolbrunbaldurs.is/

Sjá nánar auglýsingu frá Foreldrafélagi Grunnskóla Bláskógabyggðar hér til hliðar undir; Á næstunni.

Fallegt handverk

hilmar — Sun, 19 Feb 2012 14:31:21 +0000

Þessa dagana eru kennarar grunnskóladeildar að leggja lokahönd á námsmat vetrarannar. Fyrir helgi fara nemendur heim með námsmatsmöppurnar sínar og skoða þær með foreldrum sínum. Mánudaginn 27. febrúar eru síðan vetrarsamtölin þar sem nemendur ásamt foreldrum hitta umsjónarkennara. Tímasetningar samtalanna fara heim á fimmtudaginn.

List- og verkgreinar eru metnar alveg eins og bóklegu greinarnar. Nemendur í 6. bekk smíðuðu í vetur kistil með kúptu loki. Á myndinni hér til hliðar má sjá kistill sem Paulina smíðaði. Eftir að hún fór með hann heim límdi hún á hann kuðunga. Mjög fallegt handverk.

Frá Leikfélagi Sólheima

hilmar — Mon, 13 Feb 2012 15:47:55 +0000

Nú eru að hefjast æfingar hjá Leikfélagi Sólheima á hinu sígilda verki Thorbjörns Egner, Kardimommubænum.
Sýningin er stór og fjölbreytt og krefst margra leikara. Þess vegna langar Sólheimum til þess að bjóða nemendum í grunnskóladeild Kerhólsskóla að taka þátt í leiksýningunni með okkur. Fjölmörg hlutverk eru í boði, börn og alls konar dýr þannig að allir gætu fundið eitthvað við sitt hæfi.
Æfingar fara fram í Íþróttaleikhúsinu á þriðjudögum kl. 15:45 og á föstudögum klukkan 15:30. Ekki er víst að alltaf þurfi að mæta á æfingar því ákveðin atriði verða æfð í hvert sinn og þá þurfa bara viðkomandi leikarar að mæta. Ath. að tímasetningar gætu breyst.
Það verður líf og fjör á æfingunum og mikið sungið og trallað. Áhugasamir geta haft samband við Þórnýju í síma 8634490 eða á netfangi thojak@centrum.is

Hvatningarverðlaun til 1.- 4. bekkjar

helga — Fri, 10 Feb 2012 11:19:31 +0000

Kerhólsskóli tekur þátt í Lífshlaupinu nú í ár eins undanfarin ár.

Í vikunni var hópurinn í 1. -4. bekk í Kerhólsskóla dreginn út úr hópi þeirra sem skráðir eru til þátttöku.

Í verðlaun hlutu þau glæsilega ávaxtakörfu.

Mat á skólastarfi

hilmar — Thu, 09 Feb 2012 18:55:31 +0000

Þessa dagana eru foreldrar og starfsmenn leik- og grunnskólans að svara rafrænum spurningakönnunum sem varða nám og kennslu í skólanum. Kannanirnar voru sendar út í tölvupósti. Góð þátttaka allra í matinu er skólanum mikils virði því með því sjáum við hvað vel er gert í skólanum og hvað þarf að bæta. Nemendur svöruðu könnunum í skólanum síðastliðinn miðvikudag.

,,Ég á ekki frumskóg”

hilmar — Thu, 09 Feb 2012 18:33:32 +0000

Barn heyrir orðið frumskógur og segir: „Ég á ekki frumskóg ég á bara kuldaskó”.

Kennari sem er að vinna með stafrófið spyr börnin hvort G geti sagt nafnið sitt sjálfur. Stúlka nokkur svarar galvösk: „Ha,ha, nei, stafir kunna ekki að tala sko!“

Tvö börn skoða í bókum dýr. Annað segir; ,,Sjáðu þetta er mu” , Hitt svarar ákveðinn: „Þetta heitir ekki mu, þetta heitir kú!“

Veggspjaldið með þessum skemmtilegu gullkornum má finna hér.

Skoðið einnig þessi skemmtilegu myndbönd hér.

,,Góðan daginn nörd”

hilmar — Mon, 06 Feb 2012 19:23:56 +0000

Í dag, mánudaginn 6. febrúar er dagur leikskólans haldinn hátíðlegur í leikskólum landsins. Kerhólsskóli hélt upp á daginn með því að hafa opið hús fyrir foreldra í leikskóladeildinni í morgun og boðið var upp á hafragraut ,,Svanhildar”, ávexti og kaffi.

Börnin fengu að koma með dót í skólann og bakaðar voru vöfflur síðdegis í tilefni dagsins.

Skólastjóri afhenti sveitarstjóra veggspjald sem Félag leikskólakennara gaf út í samstarfi við fleiri aðila í tilefni dagsins. Veggspjaldið er með ýmsum góðum gullkornum frá leikskólum landsins. Hér koma nokkur:

Kennari kemur í heimsókn á deildina og segir glaðlega: ,,Góðan daginn börn.” Henni er strax svarað: ,,Góðan daginn nörd.”

Kennari að kenna tveimur börnum að opna útihurðina sjálf. Kennarinn: ,,Setjið hurðahúninn niður og sko, setjið rassinn í hurðina og ýtið svo.” Þá segir annað barnið: ,,Ég er ekki með svona stóran rass!”

Barn sagði við kennarann. ,,Ég er að syngja ósýnilegt lag.”

Fleiri gullkorn koma á heimasíðuna á næstu dögum. Fylgist með

Dagur leikskólans er samstarfsverkefni Félags leikskólakennara, mennta- og menningarmála-ráðuneytis, Sambands íslenskra sveitarfélaga og Heimilis og skóla. Sjá nánar hér.

Vinnufundur starfsmanna um þróunarverkefnið; Til móts við náttúruna

hilmar — Tue, 31 Jan 2012 23:34:42 +0000

Á morgun, miðvikudaginn 1. febrúar kl. 14:15 verður vinnufundur með öllum starfsmönnum Kerhólsskóla vegna þróunarverkefnisins; Til móts við náttúruna. Starfsmönnum verður skipt í 4 vinnuhópa sem fjalla um afmörkuð efni.

Hópur 1 mun skipulegga vinatengsl leikskólanemenda og nemenda í 5.-6. bekk. Gerð verður skrifleg áætlun um samstarf ,,vina“ fram á vorið, dagsetningar og markmið. Einnig verður hugað að útfærslu á útikennsluverkefnum sem fara í Námssjóð skólans, en Námssjóðurinn er verkefnabanki sem tengist útináminu. Þess má geta að nemendur 5. – 6. bekkjar eru orðnir mjög spenntir að hitta aftur vini sína í leikskóladeildinni eftir vel heppnaða skógarferð í desember.

Hópar 2 – 4 munu fara yfir gátlista sem starfsmenn fylltu út í janúar varðandi Grænfánaverkefnið okkar. Kerhólsskóli er Skóli á grænni grein og stefnir að því að flagga Grænfánanum í vor. Farið verður yfir það hvað á eftir að gera til að uppfylla skilyrði Grænfánaverkefnisins.

Eftirfarandi vinnuhópar munu starfa:

1. Vinatengsl, leik- og grunnskóla.

Þórunn – Anna Margrét – Hilmar – Hófi – Svanhildur – Magga

2. Gátlistar – Leikskóladeild

Kristín, Úlla, Helga

-3. Gátlistar – Grunnskóladeild

Alice, Ásta, Krystyna, Jóhanna

-4. Gátlistar – Mötuneyti

Áslaug, Birna, Ragna

Góður árangur Kerhólsskóla í samræmdum könnunarprófum

hilmar — Sun, 29 Jan 2012 21:15:26 +0000

Í byrjun desember birti Námsmatsstofnun yfirlit yfir einkunnir samræmdra könnunarprófa yfir tímabilið 2005-2011 fyrir alla grunnskóla landsins. Samræmd könnunarpróf meta ákveðna þætti í starfi skóla og í tilfelli Kerhólsskóla er um að ræða einkunnir í íslensku og stærðfræði í 4. og 7. bekk.

Í skólastarfi eru margir þættir sem skipta mjög miklu máli. Einn sá mikilvægasti er að nemendum líði vel í skólanum. Einnig er mjög mikilvægt að nemendur fái nám við hæfi. Með því að koma til móts við hvern og einn nemanda og vera með fjölbreyttar kennsluaðferðir eru meiri líkur á að hver einstaklingur fái að njóta sín og líði vel í skólanum.
Hægt er að meta ýmsa þætti skólastarfs s.s. líðan, samskipti, árangur í ákveðnum bóklegum námsgreinum, árangur í list- og verkgreinum, samstarf við grenndarsamfélagið og svona mætti lengi telja.

Í samræmdum könnunarprófum er verið að meta árangur í ákveðnum námsgreinum og gefur
niðurstaðan okkur vísbendingar um það hvernig nemendum skólans vegnar á þeim sviðum en ekki á öðrum.

Niðurstaða Kerhólsskóla á þessu tímabili er mjög góð. Skólinn er vel yfir landsmeðaltali og meðaltali skóla á Suðurlandi. Skólinn er efstur á Suðurlandi í íslensku í 4. bekk, í 3. sæti í stærðfræði í 4. bekk, 3. sæti yfir skóla á Suðurlandi í íslensku í 7. bekk og 5. sæti í stærðfræði í 7. bekk.

Til hamingju nemendur með góðan árangur.

Hilmar Björgvinsson skólastjóri